يا راجع م الحجاز

حمدالله ع السلامه .. يا راجع م الحجاز


وف ثغرك ابتسامه .. وف قلبك اعتزاز


ووشك فيه علامه .. بتعبَّر عن شهامه


ومعاك هدايا يامـا .. لحبايبك العُـــزاز


ـــــــــــــــــ


واللي يسلم عليك .. ويشوف عزة كرامتك


والتقوى من عينيك .. مزوِّده ف وسامتـك


يتمنى يبوس إيديـك .. ويحس باللي فيـــك


وازاى ربك هاديك .. والحج علا َّ قيمتك


ــــــــــــــــ


راجع زى الوليـــد .. مفيش عليك ذنوب


والنور عمَّال يزيد .. بالتقوى في القلوب


راجع إنسان جديد .. مشتاق إنك تعـــود


ويقرب البعيـــد .. وتزور تاني الحبيب


ــــــــــــــ


ويا ريت تكون دعيت .. يكْرم مصر الحبيبه


ويحْمـــي كل بيــــت .. م البلطجه الرهيبــه


وطلبـــت م المُغيـت .. بقـُدرتـُـــه يـِغِـيـِــت


من اعتداء غتيـــت .. وتصرفات مُريبـــه


ــــــــــــــــ


بتجرجر البلـــــــد .. لمستنقـــع مصايِّـــب


وهموم ملهاش عدد .. في وسْط أمن غايِّب


والبنـــت والولـــد .. مبقــاش ليهـُم سَنـَـــــد


حتى اللي كان وتد .. أصبح ضعيف وخايِّب


ــــــــــــــــ


وشبابنا اللي انتفض .. وقــــام بأغلى ثوره


الشيخ عليه فرَض .. نفـْسُه بأغلس مناوره


زوِّد حَبَّه النكــــــد .. وبالاستهبـــال أخـَـد


حَقــُّـه وراح قـَعَــد .. بدالـُه في المشاوره


ــــــــــــــــ


والفِتنه ولـَّعِــــت .. وبقت مصر ف خطر


والدنيا شعللــت .. لاكِـــن ربك سَـتـَــــــر


مصالحنا اتعطلِـــت .. والبورصه اتبهدلِت


والحالـــــــه اتقندِلِت .. وبلدنـــــا بتنشطـَر


ـــــــــــــ


نتمنـَّى المبروكين .. إللي زاروا الرسول


يكونــوا بدعوتيـــن .. قالوهم بالقبـُـــول


مـن رب العالمين .. وهُمَّـــا مِحْرميــن


يجعلنــــا سالمين .. من فِتنة الفلـُـــــول


ـــــــــــــــ


ولما يعودوا لينــــا .. بصحبة السلامــــه


نمِدِّلهـُــــم إيدينــــا .. ونقول ألفين سلامه


وعشان سنـِّة نبينا .. هنكون في العيد فدينا


ومن القلوب دعينا .. يصون مصر الكرامه


ـــــــــــــــ


وان كان فيه حد غادِر .. وراح قضـَّى الفريضه


ربَّك كريم وقادِر .. يشـْفي نفـْسُــه المريضـــــه


يرجع غير لمَّا غادِر .. من بلدُه يوم ما سافِـــر


ويعود إنسان مُبادر .. بتضحِيَّات عريضــــــه


ــــــــــــــــ


والكل يبقى راغِـــب .. يسابـِــق الزمــــن


عشان يقدر يواكِــب .. تطـوُّر المكـَـــــن


ويُعبُر المصايّــــــِب .. ويعمَّر الخرايِّب


والكل يكون حبايِّب .. في خدمة الوطـن

اللهم ارزقنا حج بيتك الحرام و ارزقنا الصلاة فيه يا رب العلمين

يتمنى يبوس إيديـك .. ويحس باللي فيـــك
وازاى ربك هاديك .. والحج علا َّ قيمتك
هاااااااااااااااااااااااااااااااااااااااااااااااايل
القلـــــــــــــــــــــــــــــب الطـــــــــــــيب
الحبـــــــيب
ابو احمـــــــــــــــــــــــــد
مجهـــــــــــــــــــــود تشككككككككككككككككر عليــــــــــة
[ندعوك للتسجيل في المنتدى أو التعريف بنفسك لمعاينة هذه الصورة]

[ندعوك للتسجيل في المنتدى أو التعريف بنفسك لمعاينة هذه الصورة]الاعزاء
كبرياء
عبير
[ندعوك للتسجيل في المنتدى أو التعريف بنفسك لمعاينة هذه الصورة]

ابو وليد صاروخ المنتدى
مشكوووررر مرورك الانيق [ندعوك للتسجيل في المنتدى أو التعريف بنفسك لمعاينة هذه الصورة]