جوابات لوسطى حراجي القط لزوجته فاطنه أحمد عبدالغفار

أوسمتى :

جواب رقم (1)

الجوهرة المصونة
والدرة المكنونة
زوجتنا فاطنة احمد عبد الغفار
يوصل ويسلم ليها
في منزلنا الكاين في جبلاية الفار

أما بعد...
لَذا كنت هاودت كسوفي عالتأخير..
والله ما كنت حاخُط بيدّي حرف..
سامحيني يا فاطنة ف طولة الغيبة عليكم
وانا خجلان.. خجلان..
واقولك يا زوجتنا أنا خجلان منكم..
من هنا للصبح.
شهرين دلوقت..
من يوم ما عنيكي يا فاطنة
بلّت شباك القطر..
لَسْوَعْتي بدمعِك ضهر يَدَيّ
لحضتها قلت لّك:
"قبل ما عَوْصَل عتلاقي جوابي جَيْ..."
نهنهتي وقلتي لي بعتاب:
"النبي عارفاك كدّاب...
نسّايْ
وعَتنسى أول ما عتنزل ف اسوان.."
ما عرفت ساعتها يا مرَتي أضحك ولّا ابكي..
ما عرفت ساعتها إذا كنت باعوز القطر يقف ولا يولّي...
حسيت بعنيكي الحيرانة يا فطنة بتقوللي...
وتسكت...
وتقوللي...
حسيت –واليد بتخطفها يد الجدعان-
بالقلب في جوفي ما عارف ان كان بردان.. دفيان..
والبت عزيزة والواد عيد..
قناديل في الجوف...زي ما بتضوّي..بتقيد..
...والقطر اتحرك
وقلبي بيتنقّل من يدّ..لإيدْ
اتدلدلت بوسطي من الشباك..
" خدي بالك م الوِلد..
راعي عزيزة وعيد"
والقطر صرخ ورمح لكإنّه داس على بصّة نار..
ولقطت الحس قريّب قد ما كنتي بعيد:
"قلبي معاك يا حراجي هناك ف اسوان.."
.........
ورميت نفسي..وسط الجدعان...
وبكيت..
وبلدنا اللي كنا بنمشيها ف نص نهار..
كان القطر ف لحضة..فاتها بمشوار..
سامحيني يا فاطنة ع التأخير..
ولو الورقة يا بت الخال تكفّي..
لأعبّي لك بحر النيل والله بكفّي..
كلام.
وختاماَ ليس ختامْ
بابعت لك
ليكي ولناس الجبلاية ولبتي عزيزة والواد عيد
ألف سلام.
زوجك
لوسطى حراجي
ملحوظة:
إكتبي ع المظروف..
أسوان..
زوجي الغالي..
لوسطى حراجي القط..
العامل في السدّ العالي..

أوسمتى :

جواب رقم (2)

أسوان..
زوجي الغالي..
لوسطى حراجي القط..
العامل في السدّ العالي..

...زوجي حراجي
فوصلنا خطابك..
شمينا فيه ريحة الأحباب.
ربنا ما يورّي حد غياب.
مش أوّل مرة البسطاوي يخطّي عتبة الدارْ؟!
عمرنا يا حراجي ما جالنا جوابْ !
النبي ساعة مرزوق البسطاوي.. ما ندَه
كدة زي زي ما اكون دقّت في حشايا النار
زي ما كون العمر بيصدق..بعد ما كان كدّاب
اتأخرت مسافة كبيرة ..كبيرة عليّ
عارف فاطنة يا حراجي لا ليها عايل..ولا خيّْ
ليه تتأخر كدة يا حراجي..؟
طب والنبي وكإن ورقتك دي
أول قنديل يتهزّ ف جوف الدار..
أول نِدعة ضوّ..
الدار من غيرك يا بو عزيزة هِوّْ.
وعزيزة وعيد..
من غيرك يا حراجي
زي اليُتَما في العيد.
الواد على صُغْره حاسس بالغربة وبالبُعْد.
ولا عاد حتى بيطلع يلعب في القمّاري مع الوِلْدْ..
اطلع واخش..اطلع واخش القاه..غيمان
زي اللي محروق له دكّان..
ويقوللي:
"فين يا امّه أسوان..؟
وابا سابنا ليه يا امّه؟ ما يمكن زعلان..؟"
شهرين يا بخيل..؟
ستين شمس وستين ليل..؟

النبي يا حراجي ما اطول قلبك
لاقطع بسناني الحتة القاسية فيه.
.........................
كل الجبلاية تسلم فرداً فرد..
مِ الحاج "طِلب حامد" لعيلِّة بيت "علي سعد"
وانشالله يا حراجي ما يورّيني فيك يوم
وانشالله تكون تعلمت تردّ قوام..
وما دمنا احنا رسينا عالعنوان
والله ما حنبطّل بَعَتان..
مفهوم..
أسوان..
زوجي الغالي..
لاوسطى حراجي القط..
العامل في السدّ العالي..

زوجتك فاطنة أحمد عبد الغفار
جبلاية الفار

أوسمتى :

جواب رقم (3)

الجوهرة المصونة
والدرة المكنونة
زوجتنا فاطنة احمد عبد الغفار
يوصل ويسلم ليها
في منزلنا الكاين في جبلاية الفار

أما بعدْ..
فهذا تاني خُطاب..
باعتين طيّه ما قدرنا المولى عليه..
وعنبعتلك في ظرف الجمعة.. طرد
الطرحة والجزمة بتوعك..
وكساوي عزيزة وعيد.
دوّرت الحسبة فراسي وقلت يا واد يا حراجي..
هوه يعني قانون العيّل ما يدوقشي الكسوة..
غير في العيد؟
أمّال كيف العيِّل حيحس بابوه حنبه
إذا كان الأبُّ بعيد...؟؟
بقى أول ما دلقنا يا فاطنة بابور السد على محطة إسوان
أنا والجدعان
حسيت بالدوخة
مش أول مرة باسيب جبلاية الفار..؟
رحنا المِكتب..
طلّعنا البطاقات..
ومضينا على الورقات..
آه يا "فطاني" لو شفتي الرجالة هنهْ...
قولي ميات..ألوفات..
بحر من ولاد الناس..
إللي من "درجا" واللي م "البتانون"
واللي من "أصفون" و "التل"
جدعان.. زي عيدان الزان
سايبين الأهل..
وتطلّي ف عين الواحد يا ولداه ع الغربة !
عارفة يا مرتي الراجل في الغربة يشبه إيه..؟
عود دُرة وحداني..ف غيط كمّون.
حسيت بالخوف ناشع في عروقي زي البرد.
قضّينا الليلة الأولانية في أي مكان..
العين مشقوقة..
والبال..
زي الغلّة اللي بتسرسب من يد الكيّال.
وندهن عليكم قلت: يا فاطنة أنا بانده..
سامعاني ؟!
سامعينّي يا عيال؟!
النبي لولا الخوف واللومة من الرجالة..
لاركبت القطر وعدت
قبل ما اروح لموظف
قبل ما اردّ سؤال.
وقعدت أعقّل نفسي واقول: يا حراجي يا بوي
أمّال جيت ليه ؟
الخايف مالغربة ما يجيشْ
اتحمّل علشان كسوة عيدْ..ورغيف العيش
لكإنّك رحت "الديش"...
من خوفي يا مرتي
قعدت أهدّي الرجالة.
فاطنة..
أول ما تفكّي الخمسة جنيه
اطلعي ع الفور..
وادّي حساب "عمران" وجنيه " بمبة الصباغ"
والباقي زيحوا بيه القارب
لما يعدّلها الرحمن.
سلّمي ع الوِلد..وع "الحاج التايب"..
بلا كتر كلام
سلّمي على كل اللي لينا فيهم نايب..
واوعي يا فاطنة لما ارجع وأبص في وش اللّولادْ..
أعرف إن أبوهم كان غايب.
واحنا هنا بنستنى الجوابات بفروغ صبر
طول ما الجوابات رايح وجاية..
اعتبري كإني باجي أشوفك
واجي..

زوجك
لاوسطى حراجي

أوسمتى :

جواب رقم (4)

أسوان..
زوجي الغالي..
لوسطى حراجي القط..
العامل في السدّ العالي..

وصلنا الطرد وجانا المبلغ يا حراجي..
أحياك الرب وأبقاك ألفين عام..
ولا عاد يقطعلك عادة ولا حِس..
ولا يقفل لك كفّ..
ولا يطوي من قدامك سجادة الخير والسعد..
أمّا بعد..
فاحنا وزّعنا المبلغ زي ما قلت..
ولعلك ما تشغلشي نفسك بينا وأبقى ف راحة بال..
إحنا يا حراجي –بعد الشر- إن ضاقت بينا الحال..
يكفينا ريال..
كفاية علينا البسطاوي الضهر يخطّي عتبة الدار
امبارح..جانا "الشيخ قُرَشي".. وخبّط ع الباب..
جه ساعة المغرب
قاللي لا بُدّن ما نبصّ لعيد..
قاللي: "يا بت المرحوم..
الواد لازمه الكتّاب
يوم السوق..
إتدلّي هاتي له قلمين بوص..ودواية..ولوحْ"...
وضحك..بعدين قاللي: "لاحسن يطلع لوح"
وانا بيني وبينك يا حراجي عاوزاه يكبر
ويعوضنا عن الأهل ويعمل لنا قيمة..
عاوزة تكون قيمته ف جبلاية الفار قيمة القيمة..
اللي بتقوله عن أسوان يا بو عيد..
حكاية ولا حكايات أبو زيد..
هيا يعني.. مش زي بلدنا..؟
أمال ناسها بيسووا ايه..؟
ما بيشتغلوش ليه؟
وانت..طول عمرك راجل صاحب فاس
فهّمهاني دي
لاحسن عاملة في راسي زي الخبطة...
كيف صاحب الفاس يصبح أوسطى..؟
................................
في الليل يا حراجي تهفّ عليّا ما عرف كيف..
هففان القهوة على صاحب الكيف..
وبامد ايديا في الضلمة ألقاك جنبي.
طب والنبي صُحّ ومش باكدب يا حراجي.
وباح سمعاك ان الدنيا لذيذة.
قوللي يا حراجي..
بتاكل كيف..؟ وبتلبس ايه؟ وبتقلع ايه؟
بتنام فين؟
قاعد في المطرح مع مين؟
مين اللي بيغسلك توبك
وبتتسبّح فين...
.................................
في نهاية القول..
أنا راح أشيّع عيد ع الكتّاب..
فابعت له ووصّيه على شد الحيل..
وجميع الناس في الجبلاية
عايزين لك كل سعادة وخير.
وبيتمنولك تاني ترجع في سلامة..
تعمّر مصطبتك..
وتقيد اللنضة في الدار.

زوجتك فاطنة أحمد عبد الغفار
جبلاية الفار

أوسمتى :

جواب رقم (5)

الجوهرة المصونة
والدرة المكنونة
زوجتنا فاطنة احمد عبد الغفار
يوصل ويسلم ليها
في منزلنا الكاين في جبلاية الفار

مشتاق ليكي شوق الأرض لبلّ الريق..
شوق الزعلان للنسمة.. لما الصدر يضيق
مشتاق..
وامبارح.. قاعد.. قدّامي عرق حديد.. وف يدّي الحفّار..
غابت عن عيني الحتة اللي انا فيها..وغابوا الأنفار
تحت الأنفاق..
الضلمة يا فاطنة
بتساعد على سحب الفكر..
تلاقيكي ولا عارفة الانفاق.
ولقيت نفسي على بوابة جبلاية الفار..
باخد الاحباب بالحضن
كانس كل دروب الجبلاية بديل توبي
طاوي كفوفي وباخبّط بيهم على صدر الدار
قلتي لي مين؟
مسيت الدمعة في حزنك بايدي..
مسيت الدمعة اللي ف حزنك..
ما اعرف خدتك في حضيني ولا انتي خدتيني ف حضنك
وعزيزة وعيد حواليا يشدوا الجلابية
ويشمّوا ف غيبتي وفي ايديا..
وقعدت بيناتكم.. وبكيت..وضحكت
لما لمحت عصايتي وتوبي.. وفاسي.. ومداسي
يمكن ساعة.. وقف اللّمهندس على راسي..
ولمس كتفاتي بصابعه..قمت لفوق..
طبطب على كتفي..
وخدني من يدي برة النفقات في النور.
ضيعنا نص نهار
وسألني..قلت الشوق..
قاللي اسمع يا حراجي أقولك..
ويا فاطنة قعد يحكي ويتككلم..
ألقط كلمة وميّة تروح..
وكلام م اللي يرد الروح..
وحكى لي عن أسوان والسد..
وحكى لي عن اللفرنج وعن حرب المينا..
في الجوابات الجاية يا فاطنة عاقولك واحكي لك
أما عن نفسي فانا لا بخيل ولا شيّ
كيف اللي ف قلبي بس يا ناس أرويه في جواب ؟
أما عن عيد..
فانا من بدري يا فاطنة قلت يروح الكتّاب..
واقل ما فيها..
عيفُك الخط ويحفظ له كام سورة
والامر دة بس يا فاطنة يعوز شورة ؟
على خيرة الله..
ووصلنا فطيرك..
قعمزت ما بين الرجالة وكلناه..
يعني انا دقته..؟
والنبي بعنيا قعدت اتفرّج ع الرجاله بياكلوه
كنا طالعين م الشغل نشُرّ عرق..
بت يا فاطنة..
النبي في الدنيا ما فيه واحدة بتسوي فطير زيّك..
شفت دة في عنين الرجالة.
سلاماتي لكل اللي يقولك شحوال حراجي
وسلامي لعزيزة وعيد..
أمانة عليكي لحين ماجي..

زوجك
لوسطى حراجي

أوسمتى :

جواب رقم (6)

أسوان..
زوجي الغالي..
لوسطى حراجي القط..
العامل في السدّ العالي..

فنعرِّفكم..إحنا بخير..
ولا يلزمنا إلا رؤية وجه الغايبين.
مرزوق البسطاوي مرته وضعت..حدفت ولدين
وجوابك وصل الجبلاية امبارح..
لكن مرزوق ما سرحشي غير اليوم.
وما دنتو ف صحة وعال..
احنا ما يلزمناش أكتر من ورقة ف ظرف.
ناس الجبلاية كبيراً وصغيراً عاوزين رؤياك.
قوللي يا حراجي بحق..
عامل كيف بس ف ليل الفرقة..؟
واللهي ما خشّ دماغي حاجة من اللي كاتبه في الورقة..
ويا خوفي عليك..
بيقولوا فيه ناس ماتوا في اللي اسمه السد..
طمّنا عليك يا حراجي..
.............................
قسِّمنا مع بيت العطار بلح النخلة الشّرك..
إذا كان لازمك منه يا حراجي ابعت قول..
مش راح تاجي..؟
طالقالك في البيت فرّوج..
علشان لما تعود م الاسوان دي تلاقيلك حتة لحم.
وام "علي اب عباس" مشغولة عليه.
بدري ما راسلهاش ليه..؟
أهي طول اليوم قاعدة ع العتبى إيد على خد..
وماسكة عود قش بتبكي وتخطط في تراب الدرب..
طمّنا عليه يا حراجي يرضيك المولى.
وإذا كان عال وف خير..
الضحك مع الجدعان..ولا رسالة لامه المشغولة أوْلى..؟
قلب الأم ان اصابه الشوق يا بو عيد..
يبقى اسخن من رمل القيّالة لما يقيد..
يبقى عش خراب بيسرّخ على طيرُه.
وعلي اب عباس عارف ان امه مالهاش في الدنيا غيره.
وامبارح كانت وسط الحريمات..
قاعدة تمسح دمعتها ف طرحتها وتقول:
اللي مانعني من الموت..
اليوم اللي أشوف "علي"" فيه متهني وفاتح بيت..
يومها أقول للدنيا ضحكت عليكي
خلاص غوري..
................................
قوله يشيّع يا حراجي..الناس زعلانة..
كل الجبلاية واخدة في خاطرها منه..
وامه عنيها كسِتها الدخّانة.
يا حراجي..
جوابك بيردّ الميّة للزور الناشف ويبلّ..
دة احنا عايشين هنا ع السيرة..
وزادنا الأخبار..

زوجتك فاطنة أحمد عبد الغفار
جبلاية الفار

أوسمتى :

جواب رقم (7)

الجوهرة المصونة
والدرة المكنونة
زوجتنا فاطنة احمد عبد الغفار
يوصل ويسلم ليها
في منزلنا الكاين في جبلاية الفار

قولي يا فاطنة للّي بنقوللو وللي ما بنقللّوش..
الدنيا مش عيش بس ولا قروش
ولا غطيان وفروش.
قولي يا فاطنة للكل..
ان احنا كنا هبل..
وضيعنا العمر فاشوش.
حتقولي عليا اتجنيت والا عييت
ويا ريتني ما رحت الداهية اللي مسينها اسوان..
ولا كنت طلعت من البيت.
لا يا فاطنةاللي بيقول القول دة..
هو حراجي ايّاه..
بس اللي قلب راسي يا فاطنة مش سهل.
طب وحياة اولادي ساعات اصحى في الليل..
عيني تتمّط يا فاطنة واراقبكم بين النجم..
واعرف ان احنا ما كناش أهل..
طب كيف أهل يا فاطنة !!
وحياة أولادي يا بت الخال حاتجن.
قال أهل..!
و"نبيهة بت المنزوع"
مرّة اتشاكلت قدامي مع "أم الملوي"..
واتفتح الموضوع..
وتقوللها يا حزينة
يا اللي ابوكي مات م الجوع..
والدنيا يا فاطنة في البر التاني
قالبة الدنيا !
ما هو دة اللي معفرتلي كياني
ومدوّرلي راحة راسي
ومخليني زي ما اكون واحد تاني.
"نبيهة المنزوع" في البر التاني من الدنيا..
لبست بدلة يا فاطنة..سامعاني؟! لبست بدلة
ونزلِت وسط المكن المتخبِّل تربط وتحل.
احنا يا فاطنة فين م الدنيا..؟
فين مخ الدنيا الجبار..
ما عرفشي كيف جبلاية الفار..؟
ليه ام علي اب عباس ملحودة حداكي في الدرب
وقاعدة تخطط في ترابه وتعدّد..؟
يا أهل الدنيا..أم علي اب عباس بتعدد وبتبكي
لإن علي قاعد وسطينا.
طب تاجي تبص ف وشه
والنبي بِقي زي اللي بيسوقوا مراكب شحن في بحر المينا..
يا ناس..
ينعل ام علي اب عباس واللي جاب ام علي اب عباس
دة الراجل من كتر اللي شافه بقى شعره ابيض.
وقال يكتب جوابات ..؟
خليها هيه في حالها هناك وسط الحريمات
دلوقت يا فاطنة مش قرشينها بيجوها..؟
خلاص.
دلوقت علي اب عباس سُكَري..؟ حشاش؟
م الصنف اللي بيغوى النسوان..؟
دة حتى بطّل دلوقتي كرسي الدخان.
وحكاية الشوق الزايد ع الحد دة..ممنوع.
سيبك من غربة جوزك واستنبهي للموضوع
دة انتي يا فاطنة نبيهة.
وان عيد اتعلّم بكرة
وقرا حكايتي في الجرانين
يبقى عندِك علم.
طب والنبي من جهة الهدّة..هدّة..
لكن راس الواحد زي ما كون بتلفّ ف حلم.
أما حكاية كيف صاحب الفاس يصبح أوسطى..
مبسوط أنا ع اللي عاملة ف راسك زي الخبطة.
يبقى برضه رجايا منصان...
وضروري يا فاطنة ماشية ف سكة فهم.
لفي العيياييل في الليل م البرد..
ويقدّرني على ما تخش الشتوية
أنقّي لي حرام صوف.
شدي حيلك مع نفسك وولادك إعملي معروف..
وامّا يعدّلها المولى حناجي.

زوجك
لاوسطى حراجي

أوسمتى :

جواب رقم (8)
أسوان..
زوجي الغالي..
لوسطى حراجي القط..
العامل في السدّ العالي..
أما عن ان احنا بنتشوّق فاحنا بنتشوّق..
والشوق في قلوبنا ناسس نسَسان.
ولا يمنعناش من شوقنا ليكم حتى قطع الخطابات.
هيه اللي حبلت بالواد..
تقدر برضه جوزها يغيب ولا ولدها..وما تتشوقش؟!
دة يبقى قليبها اسود من قلب قزازة الكحل.
يا سلام والله يا حراجي يا سلام..
ليه غايب ليك يوم ولا ست تيام..؟!
دة احنا دخلنا ف رابع شهر
والأيام تقلانة عليّا يا بو عيد.
وحكاية الشوق دي لا في الإيد
ولا ليها مواعيد.
وماله طب لما انتوا تشتغلوا هناك
واحنا هنا نشتاق؟
إحنا عاجينا الشوق ليكم أحسن م الأنفاق.
ويقوللي قال: تلاقيكي ولا عارفة الأنفاق..
طب مش عارفاها وأديني قلت.
يعني معرفتي ليها حتزودني دراع؟
وكلامك في ام علي اب عباس صعب
لكن لما قالوا امبارح ان البسطاوي في الدرب
طلعت اجري قلت حراجي بعت لي جواب..
وطلع من "علي" قلت ياما انت كريم يا رب.
بصيت لك في السر ولولوت ودانك.
ودعتلك ام علي اب عباس..
قلت دلوقتي لولا حراجي كان حيرد يا ناس..؟
وقعد مرزوق يقرالها ودمعتها تخُر.
تكلمها النسوان تضحك..لكن تقعد تبكي
وتقول مالكم بيّا بس يا خلق..؟
سيبوني.. فرحانة..وماله لما ابكي..؟
يعني الفرحة دي حاجة بتاجي يوماتي؟
سيبوني ابكي.
أهي دمعة تطفي القلب المحروق.
وانت باعتلي تمنعني عن الشوق..؟؟
..............................
اتغيّر قولك يا حراجي..اتغيّر صُح.
وحديتك بقى زي حديث الرادو.
زي كلام الأساتيذ.
طب اقولك قولة وما تقطعشي الورقة بسنّ الريشة وانت بتشتمني؟
النبي نفسي أشوف أسوان..
أشوف المكنة والمواسير والأنفاق..
وأقول ما تغفلقهاش..؟
نفسي اشوف صاحبك لمهندس دة..
متهيألي كمان يمكن وشك دلوقت اتغيّر
يمكن صوتك برضه..
يمكن شِبتْ..؟
..........................
عيد راح الكتّاب واهو ماشي زي القطر..
وعزيزة امبارح سِخنت لكن قايمة الصبح مليحة..
يمكن حتحصّب.
خلصوا القريشات.
دلوقت اختك "نظلة" حتولد بكرة ولا بعد يومين
مش برضه حنديها قرشين..
وشوية قمح وسمن؟
دي "نظلة" يا حراجي خيرها علينا..
........................
بتوِجّ النار في الجوف يا ابو عيد
وما غير الا جوابك بس
اللي ف مُقدرته يهدّينا
ويبرّد فينا النار.
زوجتك فاطنة أحمد عبد الغفار
جبلاية الفار

أوسمتى :

جواب رقم (9)

الجوهرة المصونة
والدرة المكنونة
زوجتنا فاطنة احمد عبد الغفار
يوصل ويسلم ليها
في منزلنا الكاين في جبلاية الفار

زوجتي..
أم ولادي.. وتوبي.. ولحم رقبتي..
فاطنة احمد عبد الغفار..
زوجتي واختي
سِتري..وغطايا.. والكتف اللي تملّلي شايلْني..
وشيلْتي..
فاطنة يا لَنْضة ليلي ومصطبتي..
وباب بيتي وعيلتي..
فاطنة يا ست الناس..
والله ما ضيّعنا يا فاطنة غير الفاس..
وَتاريني عرفت الهم يا فاطنة ف يوم ما عرفت الفاس
أدعي على ابويا والا على جبلاية الفار؟!
والا ادعي ع اللي علّمني أغوى كلمة أنفار..؟
في الجبلاية يا فاطنة
الواحد يغوى الكلمة دَهِيَ من غير ما يحس
ما يعرف فين غوّوهاله وف أي مكان..
زي تمام شرب الدخان.
أنفار أنفار..
ونعاود آخر الليل زي الحيطة المايلة ع الدار..
ماللين الدرب غبار وهزار..
وأتاري طيلة العمر الواحد فينا يا فاطنة
ماشي المشوار بالمندار
نفرح بالعشرين قرش..
ويوم السوق نتباهى برطل اللحم
نمشي بيه قدام الناس
شايفة يا فاطنة..؟
يقطع دة اليوم الطين اللي اتعلمنا فاس..
كان يبقى صُح الفاس لو لينا أرض..
أهي بس ف دي
يبقى الفاس فاس.
لكن ما اخيبها شغلة يا فاطنة
إن كانت في أراضي الناس.
حتقولي عليّا اتغريت ولا اتغيّرت..
أبداً وحياة النعمة يا فاطنة.. وحاحكي لِك:
..............
طبعاً..
احنا قعدنا كتير ساكتين قبل ما ياخدونا الشغل
ووصلنا هناك كان يوم إربع
طبعاَ أسوان دي جبل
هيه صُح يا فاطنة فيها سرايات ودروب إسفلت
لكن دة في الشقة التانية.
أسوان بتاعتنا يا فاطنة جبل.
إتسلّمنا لواحد ريّس تخنان وبكرش
إسمه "الحاج بخيت"..
شوفي احنا بدّرنا كيف؟
لكن برضه ما رحناش في الأوّل..
وقعدنا نعبّي بالفاس والزنبيل..
حجارة صغيرة الواحد قد المليم..
ونحولها يا فاطنة في طرمبيل ما عرفش بيروح فين..
بس طرمبيل عالي
يمكن عالي قد القطر.
طب عارفة
يقدر واحد من دول على ضهره يشيل ميت نخلة.
وف يوم..نقّاني "الحاج بخيت"
انا وتلاتة معايا عشان نزرع دلاميت.
أهي دي الشغلة اللي تخوّف واللي تموّت صُح.
أصعب ما يكون ف اسوان هيه حكاية الدلاميت.
صوابع طولانة كدة..ننكتها في اللّجبال..
ونقيد السلك يا فاطنة ورمح..
بيفرقع..نجري ونتكفّى..
صدّقي لما يا فاطنة يقولوا قدّامك
شفنا خلق بتتوفّى.
أصعب ما يكون في اسوان هوه الدلاميت
تتشال الدنيا وتقعد أي جبل ينزل فرافيت.
يقعد مُدّة في وداننا الزنّ
تقولي يا فاطنة لو شفتي الدلاميت
الجبل اتجن.
وقعدت اقول ليه يا حراجي..
يشيلوا ويعافروا في الجبل اللّمعافرة دي..؟
يكونوش ناويين ع الزرع يا جدعان؟؟
وطب دي حتت زرع..؟
يعني ضايقة الدنيا معاهم مش لاقيين
غير الأرض الطوب..؟
هيه الناس دي يا ولاد بتفكر بالمقلوب..؟
وبقينا آخر الليل نفرش على حتة في الشغل
واقعد أتكلم واتحدت طول الليل أنا والملوي وعلي اب عباس
هوه صُح الدلاميت
أسهل من شيلة الفاس..
لكن بيقلّعوا في الجبل العالي دة ليه؟
مالقينا جواب..
أصل الللي معانا يا فاطنة مش من اهل اسوان
علشان يقولولنا.
جايين زيّينا من ميت جبلاية فار..
ما هو كانوا هناك زيّينا بيشتغلوا أنفار..
يخرب بيت اللي ضيّع عمرنا هُفت وطلّعنا وشيّب
راسنا في حكاية الأنفار
إتعلّمنا من الصُّغر يا فاطنة
ان ما فيش في الدنيا إلا شغلانة الأنفار.
طب عمرك سمعانة بالدلاميت..؟
صوبعين لما يطرشقوا تحت البيت
عايجيبوا عاليه في واطيه.
وانا حتى كنت حاقرّب كيف م الدلاميت..
لولا ما اختارني يا فاطنة "الحاج بخيت"
إن كان على اسمه أهي كل الناس بتقول
دلاميت دلاميت..
أصله هوه اسمه حلو
دلاميت..
لكن فيه واحد قرّب وشّه فيه شافه..؟
دة حتى فيه شغالة في الدلاميت ويّانا
كانوا يحطّوا الصوبعين ويفرّوا..
من غير ما يحقّقوا فيه
ولا يعرفوا دة اللي في العلبة وبيفرقع لما يحطوه
كونته ايه؟
لكن جوزك صدّق ما لقيها.
عرفوني قوام..
وغويت الشغلة يا فاطنة..
تفطرني بأيام العوم..
مش فاكرة اتعلمت العوم قبل بقية الولد..؟
بقي دة يقول يا حراجي
ودة يقول يا حراجي..
اهوه من تحت الشغلة دهي
اتعلمت الإخّير في الجوابات.
كنت أنام واصحى أفكر واحلم في الدلاميت
لا عيال ولا مرة ولا بيت.
وعلي اب عباس ما رضيش..
قاللي "سيبني في الفحت..
اللي عارفه احسن من اللي ما تعرفهوش.."
قاللي "سيبني في الكحت..
شغلانة عارفها وعارفاني..وارتحت
مالي؟ تاجيني خبطة..وامي وراي..
خليني قاعد عايش لما تقضّي يومينها"
قلت له " يعني انا االلي ماليش ناس يا علي.."؟
قاللي "لا..بس انت معافر..
والدلاميت اعمى وكافر.."
وحاقولّك ايه ولا ايه..؟
جُرن حديت ما يفُضّ يا فاطنة..
وانا لولا عارفك جدعه وعارفاني عاقل
أبعتلك..؟
لأ..انا عارف القصة تخض
سلّمي على عيد..
وقولي له الرب يقرّب في المواعيد..
دة نهار لقياكم هوه الفرحة يا فاطنة
وهو العيد.

زوجك
لوسطى حراجي

أوسمتى :

جواب رقم (10)

أسوان..
زوجي الغالي..
لوسطى حراجي القط..
العامل في السدّ العالي..

أما بعد..
قاللي قولي لابويا كمان جوابين..
وأكون اتعلمت اقرا الورقة وافك الخط.
قاللي طول م البسطاوي بيقرا الجوابات..
سرنا مكشوف..
واللي جوّانا يامه يكون معروف.
رديت ع الواد عيد يا حراجي
قُلتله ما تخافش
ولو اني معاه ف القول..
قلت: أبوك بيقول انقلوا للناس..
بيقول: انقلوا قولي للي بنقولله واللي ما بنقللوش.
هوه أبوك بيقول مشتاق اتمد معاكي فوق الفرش..؟
دة بيتكلم ع الفاس والناس..
ولو انه لو قال...
لكن آدي القسمة
بلانا براجل يغوى الشمش
أكتر من سهر الليل.
كمّل يا حراجي..قول.
واللهِ طول حسّك ما بيطلع م الورقة..
وانا زي ما كون شايفة الأسوان بالعين.
والنبي يبقى انت صُح بقيت اوسطى..
بيقولوا قال..لابس..
أقول ايه بس النبي مكسوفة يا زوجي..
قلعت التوب قال..؟
بيقولوا بقيت مهندس يا حراجي وبيقولوا انك
مستوظف صُح.
كمّل يا حراجي..حكاية الشغل..
بس اوعى تنسى تقوللي ساكن ف المُطرح مع مين..
وبتاكل ايه؟ وبتلبس ايه؟ وبتقلع فين..؟
مع اني خابرة انك واللهِ ما حترد
عزيزة دلوقتي بتنطُق..
بتقول امبوه..
فيه عيّل يقول امبوه قبل ما ينده علىابوه..؟
اهي هيّه البت عزيزة
ما انت غايب عاد.
.....................
في المغرب رحت قعدت ف عتبة بيت "طِلِب الحداد"
حتقول اتباهت..
أبدا والله يا حراجي..
ما هم اللي فتحوا السيرة عاد.
وأقول الحق..
انا صدّقت لقيت ناس تفتح لي السيرة..
وحكيت للحريمات كل اللي قلته في الجوابات..
اعمل لك ايه..
ما انتب تكتب لي كلام
يكسر صندوق القلب ويطلع وحده..
وفيه في الجبلاية حريم
خايفة يا حراجي ما تبعت رجّالها لإسوان
"عيشة اب عفّون" قالت فيه ناس بتموت.
قالوا الجبل بيتهز ويتطوح ويقع عالولد.
وقالوا ساعات الولد يدق ف توبها الكبريت.
أقول الحق أنا في الأوّل قلبي اتمرجح
واتهزيت..
لكن اتفكرت كلامك ع الدلاميت..
وفتحت القول..قلت..وحكّيت..
النبي يا حراجي فاطنة كانت زي قناية مطلوقة..
لا همّ قاموا يسدوني ولا انا اتسدّيت.
واما رجعت البيت..
حسيت اني حراجي..
حسيت اني زيك واجعص منك.
ايه يعني لما الواحد يزرع وردة يا حراجي
والناس ما تشوفهاش..ولا تتنشقهاش..
انتوا زرعتوا الوردة..واحنا نشمّمها للناس..
مش لازم نعمل حاجة زيّيكم..؟
إبعت يا حراجي وقول..
احكي لي حكاية الأنفار
ملعون خاش اللي يكتب ورقه لمرته يا راجل
ويدكّن له فيها شوية أسرار.

زوجتك
فاطنة أحمد عبد الغفار
جبلاية الفار

هى ليس مجرد رسائل ولكن فى طياتها تعرض
لنا صورة المجتمع وبالخصوص (الصعيدى)
والحياة اليومية فمن خلال هذة الرسائل
نتعرف على الحياة البسيطة والمميزة
لنا كأرياف وحياة الكفاح والعمل الشريف
والنافع والمفيد للبلد وللفرد
بارك الله فيك ونفع بك

[ندعوك للتسجيل في المنتدى أو التعريف بنفسك لمعاينة هذه الصورة]

مشرفة أوسمتى :

[ندعوك للتسجيل في المنتدى أو التعريف بنفسك لمعاينة هذه الصورة]

أوسمتى :

[ندعوك للتسجيل في المنتدى أو التعريف بنفسك لمعاينة هذه الصورة]

مشرف سابق أوسمتى :

[ندعوك للتسجيل في المنتدى أو التعريف بنفسك لمعاينة هذه الصورة]

مشرفة أوسمتى :

[ندعوك للتسجيل في المنتدى أو التعريف بنفسك لمعاينة هذه الصورة]

[ندعوك للتسجيل في المنتدى أو التعريف بنفسك لمعاينة هذه الصورة]

مشرف أوسمتى :

[ندعوك للتسجيل في المنتدى أو التعريف بنفسك لمعاينة هذه الصورة]

[ندعوك للتسجيل في المنتدى أو التعريف بنفسك لمعاينة هذه الصورة]

أوسمتى :

[ندعوك للتسجيل في المنتدى أو التعريف بنفسك لمعاينة هذه الصورة]

[ندعوك للتسجيل في المنتدى أو التعريف بنفسك لمعاينة هذه الصورة]

[ندعوك للتسجيل في المنتدى أو التعريف بنفسك لمعاينة هذه الصورة]
القلــــــــــــــــــــــب الطيب
مصـبـــــــــــــــــــــاح المنتــــــــــدى
وكاتب روائع الصعيد
خالـــــــــــــــــــــــــــــــــــــد
على المجهود الدائم انا
مشككككككككككككككككككككور
ياصاحب الفرج ياعالى بلا درج
يامن شق البحر لموسى حتى خرج
اخرج مصرنا من الضيق الى الفـرج
[ندعوك للتسجيل في المنتدى أو التعريف بنفسك لمعاينة هذه الصورة]

مشرفة أوسمتى :

[ندعوك للتسجيل في المنتدى أو التعريف بنفسك لمعاينة هذه الصورة]

» توفي الى رحمه الله تعالى الحاج/أحمد محمد عبدالله الشهير ب (أحمد البدرى)(المقلة)
» تم بحمد الله تعالى عقد قران الأستاذ/ أحمد عبدالعزيز محمد عبدالماجد على كريمةالاستاذ/أحمد حسن الحاج(الخطارة-المقلة)
» الزوج واهماله لزوجته
» رسالة من زوج لزوجته يريد بها حياة سعيدة
» نجـــــــــــوم الألفيـــــــــــــــــــات