الحنيه يا جماعه ..

لما كنت عيل ف ابتدائي .. اجي اقف فـ اول صف في المسجد .. يقوم الرجاله الكبار يزقوني .. ويرجعوني ورا .. أضايق جدًا .. جيت فـ يوم وقفت ف اول صف .. ولسه جاي واحد يزعقلي ويبرقلي علشان ارجع ورا .. قام راجل حط ايده علي كتفي وقاله سيبه .. وصلينا وفـ كُل ركعه الراجل دا حُبه يزيد في قلبي .. وبعد الصلاه ضحكلي وعلمني اقول ايه بعد الصلاه .. وقالي تعالي اقف جنبي ف كل صلاه ف اول صف ومحدش هيقدر يرجعك ورا هحميك .. بس توعدني لما تكبر لما تشوف حد صغير متخليش حد يرجعه ورا .. الراجل دا كان حنين عليا .. طيب .. مقدرش انساه .. اتحفر حُبه في قلبي بسبب حنيته .. ونفذت وصيته اقف ف اول صف يجري العيال زي النحل جنبي واحاوطهم بدراعي ومحدش يقدر يزعقلهم ويرجعهم .
سيدنا زيد بن حارثه وهو طفل صغير عنده 8 سنين اتخطف من امه .. وباعوه علي انه عبد .. ووصل هديه لبيت النبي صلي الله عليه وسلم .. النبي بقي يلاعبه ويصاحبه .. كان حنين عليه جدًا .. أهل سيدنا زيد .. لفوا عليه كعب داير .. في كُل مكان مُش لاقيينه .. لحد لما عرفوا مكانه وانه عند النبي .. جريوا فورًا علي رسول الله .. وطلبوا منه يرجعلهم ابنهم وهيدولوا كُل الفلوس اللي هو عاوزها .. النبي قالهم عندي حل افضل .. احنا نخلي زيد يختار .. لاما يعيش معايا لاما يعيش معاكم .. ابوه وعمه فرحوا جدًا .. دا حل لُقطه .. مفيش شك يعني ابننا هيختار يعيش معانا .. النبي واقف وابو سيدنا زيد وعمه واقفين .. جه سيدنا زيد حضن ابوه وعمه وبكي من اشتياقه ليهم وهُما بكوا .. وبعد كدا النبي قاله يا زيد .. اختار .. تحب تعيش معايا ؟! ولا ترجع مع ابوك وعمك ؟! وكان وقتها النبي لسه منزلش عليه الرساله ولا بقي نبي .. فورًا سيدنا زيد اختار يعيش مع رسول الله .. وقال ملقتش احن منه عليا .. وعاش بقيت عُمره بجوار رسول الله صلي الله عليه وسلم . !
سيدنا سُليمان .. كان رايح يحارب .. ومعاه الجنود بتوعه .. عدد ضخم من الطيور والبشر والجن وهو راكب علي بُساط الريح .. شويه طاير في السما والرياح شيلاه وشويه علي الارض .. ربنا اعطاه القدره انه يفهم لغة الطيور والحيوانات ويسمعهم ! .. فـ وهو في الطريق مع جنوده .. سِمع نمله عجوزه .. بتصرخ وبتقول لصحباتها " ياأيها النمل ادخلوا مساكنكم لا يحطمنكم سليمان وجنوده " متخيل جيش جاي .. تفتكر هيهتم انه يدوس علي نمل او لاء ؟! لكن حنان النمله علي صحباتها تقولهم اجروا بسُرعه ادخلوا الجحور قبل لما سليمان يجي مع جنوده ويدسوا عليكم وهما مش واخدين بالهم .. مقالتش " ياختااااي هموووت يا ناااس ;D وتجري وتدخل جحرها وتنفد بجلدها وانشاله يولعوا ;D " ابدًا .. وهي السبب في انقاذ النمل كُله .. لانها نمله حنينه .. ولما سيدنا سيدنا سليمان سمعها ابتسم وسنانه بانت وتعجب من حنيتها علي قومها ... نمله عندها قلب وضمير
النبي صلي الله عليه وسلم .. كان متزوج السيده صفيه .. والسيده صفيه كانت قصيره .. مكنتش بتعرف تركب علي الجَمل .. النبي يقولها " اركبي " ! تقوله مُش طايله اركب يا رسول الله .. شوف النبي الحنين يعمل ايه ؟! يقوم نازل علي الارض وقاعد علي رُكبته .. ويقولها اطلعي علي رجلي .. وتقوم دايسه علي رجل النبي وتركب علي الجمل .. مُش مهم اتعفر وهدومي تتبهدل المُهم تركبي واكون حنين عليكي .. وتفضل السيده صفيه تفتكر الموقف وتبتسم طول عُمرها .
الشيخ الشعرواي بيحكي في مذكراته .. انه امه وهي حامل فيه في شهرين .. ابوه وامه مكانوش يعرفوا .. وفي يوم بعد صلاة العشاء ابوه شاف راجل مسكين ف المسجد .. فصعب عليه حاله .. قاله تعالي كُل عندي .. الراجل وافق فورًا .. أبو الشيخ الشعراوي عمله الاكل بنفسه .. فلما حطه قُدامه .. الراجل فضل يهُرش ويحُك جسمه بضوافره .. ابو الشعراوي عرف ان هدوم الراجل هي السبب لانها مُش نضيفه .. قام داخل جابله جلبيه من جلاليبه .. وخلاه يقلع هدومه الخارجيه .. واداله الجلبيه بتاعته وقاله البسها .. الراجل ياعيني يدوبك مسك جلبية ابو الشعراوي ملحقش يلبسها .. نام .. ابو الشعراوي عرف انه مُرهق وتعبان مرضيش يصحيه .. وقام مصحي مراته وقالها قومي بالله عليكي نعمل خير .. تعالي نغسل هدوم الراجل علشان الصبح ياخدها قبل لما يمشي .. قالتله دلوقت ؟! قالها ايوه .. وقام جايب طشت وفضلوا يغسلوا سوا هدوم الراجل وخلوها زي نضيفه وعال .. وجه الصُبحيه .. ابو الشعرواي قال للراجل صباح الفُل عليك .. واداله هدومه وقاله خُد الجلبيه هديه مني ليك .. الراجل قام معيط .. وقاله انت راجل حنين .. ربنا هيرزقك بابن عالم من علماء المُسلمين .. وبعدها ام الشعراوي عرفت انها حامل فيه . !
الحنيه يا جماعه .. بالله عليك متلغيش مشاعرك وقلبك وتتعامل بقسيه وجفا .. النبي متحبش علشان شكله .. اتحب لانه رقيق القلب حنون .. خليك زي بياع العطور ..نحب نتقرب منك .. تكلم صحابك او اي غريب تبقي كيوت وطيب .. وترزع الباب في وش امك ومراتك وتنفخ !! .. تكملي خطيبك بكل هدوء .. وتشوفي اخوكي تبرقيله وتطرديه من الاوضه " معقوله " !! .. بلاش قسوه .. متخليش حد يتمنالك الموت لانك شديد وقلبك وحش .. النبي كان بيوطي ويقول علي نفسه انا حصان وسيدنا الحسن والحسين راكبين علي ضهره ويقولهم " وانتم الفارسان " ! .. الالماس بقي غالي لانه مهواش موجود مع الناس .. خليك حنون لان الحنيه عمله نادره وصدقني هتبقي زي اللؤلؤ والالماس في حياة الناس .. لانك عُمله نادره .. من الناس القليله في الدُنيا .. انسان قُربك يفرح اللي حواليك .. وبُعدك عنهم يزعلهم .. لأنك ببساطه انسان حنين .. بمعني أدق وأصح #ألماسه .. :))

[postbg=https://i.imgur.com/48CU2Qx.png][ندعوك للتسجيل في المنتدى أو التعريف بنفسك لمعاينة هذه الصورة]

[postbg=https://i.imgur.com/dAQtdaR.gif]

---

[ندعوك للتسجيل في المنتدى أو التعريف بنفسك لمعاينة هذه الصورة]
الروعة والجمال والدقة
فى  سرد الاحداث بدقة  مذهلة ولهجة عامية
تخترق كل جدار فولازى وكل قلب غافل عن التعامل بالحنية وارقة
الله الله الله عليك
عالى المقــــــــــــــــــام الحبيب
ابو احمــــــــــــــــــــــــــد
فى ميزان حسنــــــــــــاتك

[ندعوك للتسجيل في المنتدى أو التعريف بنفسك لمعاينة هذه الصورة]
[ندعوك للتسجيل في المنتدى أو التعريف بنفسك لمعاينة هذه الصورة]

[postbg=https://i.imgur.com/20aRJFn.png][ندعوك للتسجيل في المنتدى أو التعريف بنفسك لمعاينة هذه الصورة]