مين فينا ح يعزي مين اللي بيموت ع الحدود واللي بيموت وسط الكمين

[ندعوك للتسجيل في المنتدى أو التعريف بنفسك لمعاينة هذه الصورة]

بقينا خلاص مش عارفين

مين فينا ح يعزي مين

اللي بيموت ع الحدود

واللي بيموت وسط الكمين

واللي قتل واللي أتقتل

للأسف مصريين

ومين مستفيد

م الموت اللي عمال بيزيد

ياريتنا كنا رافعين

البندقية وألا القنبلة

اللي بتنفجر كل شوية

في وش العدو اللعين

لكن ياخسارة

إننا بقينا لبعضنا واقفين

وإحنا الاتنين خسرانين

لو صراع عشان التورتة

قسموها بعيد عننا

بتبلعوها بدمنا

أزاي بيها مستطعمين

إحنا ع العيش الحاف واخدين

لاعمرنا استنينا التورتة

ولا قلنا في يوم عايزين

حتة منها وقلنالكم ألف مرة

إننا راضيين

بعيشنا الحاف

ولو غمسنا بطبق فول

وقرص طعمية وألا أتنين

سيبونا نعيش

في مافيش أدينا عايشين

ذنبها أيه جارتي أم اسماعين

اللي ساكنة بعد مني ببتين

خرج أبنها وبتستناه

فجأة رجعلها

اسم مكتوب في شهادة وفاة

كفن ملفوف وأبنها جواه

وذنبه أيه أبنه اللي أتيتم

ومراته اللي أترملت

ذنبهم أيه ياولادااااااااااه

بالله عليكم ابعدوا عننا

ماتزودوش علينا همنا

وقوللنا لصالح مين

أخواتنا وولادنا

يرجعولنا متشالين

ودمهم هيبقي في رقبة مين

واللي حلل قتلهم يقولي

الكلام دا فين

في أي ملة وأي دين

بالله عليكم ابعدوا عننا

ماتزودوش علينا همنا

وقوللنا لصالح مين

أخواتنا وولادنا

يرجعولنا متشالين

ودمهم هيبقي في رقبة مين