دردشة مع الفرج

فاكر يا فرج أيام زمان!
لما كان الهم ييجى بالأكوام
ولا كان يهمنى..أطمن وأخش أنام
أقوم مالنوم ألاقيك بتدينى التمام
الهم زال والدنيا بالألوان
أما الآن..تاه منك العنوان!!!

طب أسمع اللى جرالى وشوف عليك هأهون
الدنيا شالت وحطت والألم مكتوم
وبين القفا والقفا يا دوب مالحقش أقوم
وجبل الهموم بيتقل يوم عن يوم
ابتدت لما جفانى النوم
والبال لما بات شريد مهموم
وغربة مرة ولا الزقوم
فرقة أحبة وفراق أقربون
تعب وشقا وكله يهون
لكن لو الطريق مضمون
خسارة المال زادت همومى هموم
قلت مايهمش كفاية بنون
بصيت لقيتهم متعبون
ولا فارق معاهم مين حمل وسهر وقلبه حنون
ووقت الشدايد تلاقى مالجلادين مليون
واصحاب ما بين ندل ومنافق كل يوم بلون
آااااااااااااااااه ...الطف يا رب من الجنون

دموعى نشفت والقلب بات مسكين
لا طبطبة بتداوى ولا كلمتين ناعمين
لا نصيحة عادت تحوأ ولا شورة الفالحين
طااااال الانتظار وأنت فين
لسة عليك مش صعبانين

طب اسمع بقى الكلمتين
صلى بنا على سيد المرسلين
المصطفى الهادى الامين
لو أنت نسيت العناوين
مش هافضل مكتوفة الايدين
ولو باقى عالقضا شبرين
أنا عارفة هاجيلك منين
دى هى سكة واحدة ..سكة الصابرين
هأنور مصباح اليقين
وزادى وزوادى
لا اله الا أنت سبحانك انى كنت من الظالمين
ولو بعدت خطوة ..هاقرب خطوتين
فى قلب ليل الكرب هاصلى ركعتين
وفى مركب الأمل معايا مجدافين
شوية استغفار مع دعوتين حلوين
هالاقينى وصلت عندك وأخدت الجايزتين
تفريج كربى وهمى ورضا الرب الكريم
وارتاح خلاص وافوز بسعادة الدارين

يا رب يا رحيم
ما ليش غيرك معين
يا خالق الكون العظيم
تفرج همى يا عليم
انا وجميع المسلمين

بارك الله فيكي

امين يارب العالمين


[ندعوك للتسجيل في المنتدى أو التعريف بنفسك لمعاينة هذه الصورة]