ابراهيم ورجل المطافي

مشرف سابق أوسمتى :

كان ياما كان يا سادة يا كرام

ولا يحلى الكلام إلا بذكر النبي

عليه الصلاة والسلام

كان فيه ولد جميل وشاطر

إسمه إبراهيم

كان قاعد على الارض بيلعب بالعربيات بتاعته

جنب ماما وهي بتتكلم في التليفون ولقاها بتعيط

جرى عليها وأخدها في حضنه وسألها بتعيطي ليه يا ماما؟

ماما قالتله : قريبي توفاه الله

إبراهيم : يعني إيه يا ماما توفاه الله؟

زي جدو الله يرحمه؟

مين داه يا ماما؟

ماما : عمو اشرف ابن عمتي

إبراهيم : داه اللي عنده أولاد ادي؟

بس داه صغير اد بابا مش عجوز زي جدو

ماما: يا حبيب ماما ربنا سبحانه وتعالى له حكمة في الميلاد والموت

مش لازم الواحد يفضل لغاية ما يعجز

لا فيه ناس بتموت وهي صغيرة وفيه ناس بتموت وهي بيبي

وفيه ناس بتموت وهي شابه

إبراهيم : بس مش كده حرام يا ماما؟

كده أولاده مش حيكون عندهم بابا

ماما : نبينا عليه الصلاة والسلام قبل ما يتولد مات أبوه

ولما كبر واتجوز مات له أكتر من ولد وبنت وهو عايش

نبينا زعل وقال كده حرام؟

أبدا كان بيصبر ويتحمل ويزعل عليهم ويبكي

وهو عارف إنه حياقبلهم تاني في الجنة

بإذن الله تعالى

ربنا بيشوف احنا حنصبر ونقول الحمدلله على كل حال

والا حنكون وحشين ومنصبرش ونقول حرام وليه كده ؟

إبراهيم : هو يا ماما عمو أشرف مات ازاي؟

ماما : عمو أشرف يا حبيبي

ضابط مطافي

إبراهيم: بجد يا ماما؟

يعني بيركب عربية مطافي زي اللي عندي؟

[ندعوك للتسجيل في المنتدى أو التعريف بنفسك لمعاينة هذه الصورة]

ماما : آه يا قلبي بس حقيقيه

إبراهيم : هو مات وهو بيطفي حريقه؟

ماما: لا يا بيبو

هو مات بسبب إنه مرتين يدخل وسط النار علشان ينقذ الناس

وصدره اتأذى مرة بعد مرة من دخان الحرايق ودخل المستشفى

قلبه الظاهر حصل فيه ضرر وهو مش حاسس

ومرة واحده وهو في الشغل قلبه وقف ومات

الله يرحمه

إبراهيم : بس مش لازم ضابط المطافي يلبس ماسك

زي ما حضرتك حكيتيلي في الكتاب بتاعي؟

[ندعوك للتسجيل في المنتدى أو التعريف بنفسك لمعاينة هذه الصورة]

ماما : صح يا حبيبي بس ساعات المشكله بتحصل في ثانية

والحريقة بتكون كبيرة ويسمع الضابط صوت طفل صغير أو إنسان

بيصرخ وسط الناس وقلبه بيخليه يجري ينقذه

الله أعلم بس داه اللي حصل

الضباط بتوع المطافي والعساكر بيكون قلوبهم من دهب

بينقذوا ناس كتير وبيدخلوا وسط النار مرات ومرات

وكله علشان ربنا حط في قلوبهم رحمه

وكمان داه شغلهم

زي ما الدكتور بيعالج العيان

وعسكري المرور بيساعدك تعدي الشارع

وووووووووووو

رجال المطافي بيبذلوا كل جهدهم علشان يطفوا الحرايق وينقذوا الناس

[ندعوك للتسجيل في المنتدى أو التعريف بنفسك لمعاينة هذه الصورة]

إبراهيم : لما حكبر حابقى ضابط مطافي

إن شاء الله ممكن؟

ماما : لما حتكبر إنت اللي حتختار مش أنا يا حبيبي

إبراهيم : بس حضرتك حتوافقي والا حتخافي عليا؟

ماما : مش احنا قلنا الأعمار في إيدين ربنا سبحانه وتعالى؟

احنا ممكن نختار أي شغل ميكونش فيه خطر

بس لو ربنا أراد ينتهي عمرنا حينتهي بأي شكل من الأشكال

ربي يحفظك انت واخواتك من كل سوء

ويخليكم ليا

إبراهيم : ويخليكي ليا انتي وبابا يا ماما

ممكن بقى يا ماما تقريلي كتاب رجال المطافي تاني؟

ماما : من عيوني يا حبيب ماما

وبأدت ماما تمسح دموعها وتبتسم لإبراهيم

وتحكي له حدوتة رجل المطافي